بيضحك عليكي يا هبلة!!



بحكم كليتى - اللي مليش أي فضل أو ذنب فيها- ... أول ما أبص يمين او شمال ألاقي طقم الحبيبة مترصصين قدام ابعض، ولا أنزل زي أي مواطنه عادي جدا، أركب تاكسي من ع الطريق الى قدام محطه القطر... لااااااازم ألاقي الاتنين اللي الحب مقطع بعض معاهم، وماشين مش شابكين إيديهم مع بعض... لا، ده كمان شوية وهيحضنوا بعض في الشارع!!!

بلاش ده ولا ده، زيي زي أي واحدة عادي جدا، ومن حقي إني أنزل أشتري حاجة من الجلاء او المشايه او اى حته... ألاقي بقى كل الشوارع أو بالأمانة 90% من نفس الفصيلة اللي كانت برّه ماشين حاضنين بعض!! وتبقى بقى مصيبتي سودة لو فكرت -مجرد فكرت!- أتمشى في المنطقة من عند الجراج والمنطقة الهادية دي... ... بيكون برضه المكان ملغّم بالعينة إياها!!!


أنا مش كاتبة الموضوع ده، عشان أتريق وخلاص، بس بجد باعتباري بنت، وزي ما بيقولوا إن البنت ما يفهمهاش غير البنت اللي زيها، برضه الولد ما يفهموش غير الولد اللي زيه... عايز فعلا أقول لكم إن أكتر من 80% من المناظر دي، بيكون في نظرة عنيه بقى إن هو الشاب الجامد و بااااااين قوي إن ولا حب ولا ارتباط ولا جواز ولا أي حاجة من دي في دماغه! ولا هو حمل المسئولية دي خاااااالص، هو بس فرحان بالخروجة، والواد الجامد اللي مصاحب، بس كده، وشكر!!!



إنتي بقى... دماغك إيه؟ إنتي فاهمة فعلا إنه بيضحك عليكي ولا ظروفك إيه؟ لو عارفة وقشطة مستمتعة برضه بدماغ البنت الأمورة اللي الواد معجب بيها، وبيقلب موبايل أبوه بالليل ويفضل يرغي معاها، وأبوه يروح مديله كلمتين كل يوم الصبح وهو واقف زي العيل مش عارف يرد يقول إيه، و في الآخر هتسيبوا بعض، خلاص بالتوفيق وسلمي لي على منظرك قدام نفسك وقدام النجم اللي بعد شويه هيسيبك!!!
إنما لو إنتي ماشية معاه ومقتنعة إنه ولد هايل ومش بيضحك عليكي، وفعلا مصدقة كده، يبقى إنتي اللي عشانك بكتب الموضوع ده، مبدئيا مش كل الولاد بيضحكوا على كل البنات، وبيبقى فيه ولاد فعلا صادقين... عايزاكى تتأكدي من حاجة، مفيش ولد مش نفسه يعيش جو الارتباط بجد... وهو برضه بيلعب على الحتة دي جوّه البنت، إن أكيد هي كمان نفسها تعيش الجو ده، بس أنا هستلف كلمة، كان "معز مسعود" قالها قبل كده... إن لما الولد والبنت بيسيبوا بعض، بتكون عاملة زي ضربة الكوع للولد، شوية وتروح، بس للبنت بتفضل معاها كتير، عشان كده لازم تكوني فعلا متأكدة إن عمر العلاقة ما هتكون علامة وحشة في حياتك.!!

أنا مش بقول إن كل الولاد وحشين وزبالة، وهمّهُم الأول والأخير الضحك على البنات، لا طبعا، وفيه حاجات أنا شفتها بعيني كملت 5 سنين و7 سنين، وكملت على خير، بس مش هاخد القاعدة وأعممها.
وهمّ برضه مش ملايكة، خالص.. عشان كده اوعي تعملي حاجة في الضلمة.. طول عمر الضلمة غلط, وخلي أغلى حاجة عندك: نفسك، مفيش أغلى منها ولا أطهر ولا أنضف منها، ومتخليش أي حد أو أي حاجة تعكر اللون الأبيض اللي جواكي، عشان ما يكونش.. ضحك عليكي يا هبلة!!
واعدو بالعافيه بقى