العودة   منتديات المصطبة > الأقسام العامة > منتدى النقاش الجاد

منتدى النقاش الجاد ناقش معنا بهدوء وبدون تعصب أشهر وأهم القضايا والمواضيع التى تشغل الجميع

الغربه ؟؟؟!!

كاتب الموضوع: bono، فى قسم: منتدى النقاش الجاد


1 
bono

الغربه ؟؟؟!! 081209115135gDmV.gif

السلام عليكم ورحمة الله وبركاته

ايه الاخبار يا شباب ويا بنات يارب تكونوا تمام

هتكلم عن موضوع انا شخصيا بالنسبالى مهم جدا جدا وهو الغربة

طبعا ماحدش هيحس الاحساس ده غير اللى فعلا حسه لان صعب تتخيله حتى احساس فوق الوصف

طبعا كلنا كشباب دايما بندور على الفرصة الانسب لنا وعشان مستعجلين اننا نعمل مستقبلنا فى اقصر زمن

بنتجه الى الغربة وااااه لو الشخص ده عارف ايه اللى هبحصله والله استحاله كان اختاره

يروح الشاب مننا بيبقى طبعا قلقان اول مره يبعد عن بلده واهله وصحابه وجيرانه وبلد تانيه وتقاليد تانيه وعيشه تانيه

بيبقى محتار نلاقى بقى دور الاهل فى التهدية يا حبيبى عادى جدا كانك رايح تصيف وبتاع ياعينى رايح يصيف

لو المصيف كدا مش عايزين نصيف خالص الغربه ؟؟؟!! caked.gif

والشاب يهدى وخلاص ويظبط اموره وينوى الرحيل عن بلده اللى عاش فيها طول عمره

عن اهله واصحابه وجيرانه اللى قضى معاهم احسن ايام حياته

ويودعهم ويمشى واول ما ينزل البلد اللى رايحه يبدأ قلق جوه وخوف وكان قلبه هيوقف

والله العظيم انا اول ماوصلت كان نفسى ارجع اركب الطياره واقوله لف وارجع ياسطه انا عايز اروح

فعلا حاجه غريبه واحساس غريب وصعب جدا وده كله عشان احقق مستقبلى واكون نفسى واقدر اتجوز

يجى يقضى ايامه فى الغربة بعد ماكان بيلاقى اللى بيصحيه بقى بيصحى غصب عنه ويجرى على شغله

يرجع من شغله كان بيلاقى الغدا جاهز لا بتلاقيه جايب اكله معاه وقاعد لوحده وبياكل

هدومه كانت بتتغسل وتكوى لا بقى لو مرتاح بيوديها مغسله لو كدا بتلاقيه قاعد يغسل بقى

وعامل فيها نانسى عجرم اه ونص والله ينور غسيله بيبرق اصله بيتسخدم برسيل

طيب هو ده اللى صعب يا احمد لا استنى فيه حاجات هقولها ممكن تشوفها عادية

بس الحاجات دى لو حسيتها هتعرف ان الموت اهون منها بكتير

تلاقى خبر جايلك مامتك تعبانه او باباك عمل حادثه لا قدر الله او اخوك او اختك او قريبك

وانت تبقى قاعد بتكلم نفسك انا فى ايدى ايه اعمله مفيش غير انك تتابع معاهم فى التليفون

وتقفل على نفسك اوضتك وتقعد تقول ياريتنى ماسيبتهم وسافرت

بس كدا لا استنى لما تلاقى اخوك اتجوز او اختك او مناسبه فى رمضان واهلك متجمعين كلهم



وتيجى تكلمهم تلاقى قرايبك كلهم موجودين ويقولولك والله القاعده دى او الفرح او المناسبه دى

كان نفسنا تبقى موجود طبعا وانت بتكلمهم بتضحك وان شاء الله وبتاع

بس من جوه بتبقى خلاص قلبك هيوقف من الضغط ده كله

الغربة اه هتعمل فلوس بس هتخسر حاجات كتير فلوس الدنيا كلها مش هتقدر تعوضهالك

هتكبر قبل وقتك هتلاقى عندك 25 سنه مثلا تحس انك عندك 40 سنه

اقولكم على حاجه مهما حصل استحاله الواحد بيعيش يوم مبسوط ولا ينام مرتاح وهو فى الغربة

وده كله عشان خاطر اعمل مستقبلى وعشان اعمله لازم اسيب بلدى واسيب اهلى وناسى واسافر

طب هى بلدك مفهاش شغل فيها طبعا بس شبابنا عايز الفلوس الاكتر

يعنى شغل مثلا موجود 750 جنيه فى مصر

وشغل تانى بره ب 1500 ريال فى السعودية الحاجات دى بتحصل والله وقدامى

ساب بلده وجه على هنا اشتغل اخد ال 1500 ريال شيل منهم اكله شيل منهم السكن شيل منهم الاتصال

ولو بيدخن صباح الفل لو فعلا بيشد على نفسه هيتبقى 700 ريال يبقى انا اقعد فى بلدى اريح

اللى يلاقى فرصة عمل فى بلده امسك فيها والله وماتسيبهاش عشان خاطر شغل فى الغربة براتب احسن شوية

انا لو اتكلمت هتكلم لبكره الصبح والله


بس عايز اعرف رأيك فى الغربة

وايه اهم العوامل اللى بتخلى الانسان بيلجأ انه يسيب بلده واهله واصحابه

وليه الشباب مابقاش بيدور على فرصة عمل فى بلده وبقى بيختار دايما انه يتغرب

وليه بلدنا بتعتمد على العماله الاجنبية اكتر من المصرية مع ان الدوله التانيه بتعتمد على المصريين ؟

وايه الاسباب اللى بتخلى الناس تحس بالغربة وهى فى بلدها ووسط اهلها

كفايه كدا عشان ماطولشى عليكم

يلا طيروا





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.