العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"

على اسم مصر

كاتب الموضوع: MOHAMEED MEDO، فى قسم: منتدى الشعر والخواطر


1 
MOHAMEED MEDO

على اسم مصر elmstba.com_1365799627_759.jpg


على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر.


على اسم مصر elmstba.com_1365799624_137.jpg




مصر السما الفزدقي وعصافير معدية

والقلة مملية ع الشباك .. مندية

والجد قاعد مربع يقرا في الجرنال

الكاتب المصري ذاته مندمج في مقال


على اسم مصر elmstba.com_1365799620_145.jpg


ومصر قدامه اكتر كلمة مقرية

قريتها من قبل ما اكتب اسمي بإيديا

ورسمتها في الخيال على أبدع الأشكال

ونزلت أيام صبايا طفت كل مجال

زي المنادي وفؤادي يرتجف بجلال

على اسم مصر.

على اسم مصر elmstba.com_1365799618_543.jpg
شفت الجبرتي بحرافيش الحسين وبولاق

بان البلد ماشي زي النمس في الأسواق

بالفلاحين ع المداخل من بعيد وقريب

بالأرنؤوط بالشراكسة بكل صنف عجيب

على اسم مصر elmstba.com_1365799619_204.jpg



مترصصين سور رهيب
مزراق في ريح مزراق


كأنهم لا بشـر ولا خلقـة الخـلاق

ومصر فلاحة تزرق بين رقيب ورقيب



من غير أبو الهول ما ينهض
ناهضة شايله حليب


والصبح بدري الجبرتي
ينام وقلمه يسيب


على اسم مصر.


على اسم مصر elmstba.com_1365799622_475.jpg


مصر الرمال العتيقة وصهدها الجبار

والنيل كخرطوم حريقه وحيد في وسط النار

في إيدين بشر نمل رايحه وجاية ع الضفة

فيهم مطافي وفيهم كدابين زفة

وفيهم اللي تعالى وقال أنا حكمدار

وكل باب م البيبان مقفول على اسرار

وكل سر بحريقة عايزة تتطفا

من أهلي تندهلي وتقوللي تعا اتدفا

أنا اللي عمري انكتب إلى يوم ما اتوفى


على اسم مصر.




على اسم مصر elmstba.com_1365799623_946.jpg


مصر اللي عمر الجبرتي لم عرف لها عمر

وطلع لقاها مكان مليان عوام وزعر

جعيدية غوغاء يجيبوا تملي وجع الراس

وخليط أفارقه هنادوة روم ملل أجناس

والترك في القلعة والمماليك خدودهم حمر


على اسم مصر LE CAIRE - LA CITADEL04F1E.jpg



كان عمرها ستلاف سنة ..
كلها سنين خضر


بس الزمان يختلف زي اختلاف الناس

ناس تبني مجد وحضارة وناس بلا احساس

وناس تنام لما يزحف موكب الأحداث



على اسم مصر.


على اسم مصر 79.jpg


النخل في العالي والنيل ماشي طوالي


معكوسة فيه الصـور ..
مقلوبة وانا مالي



يا ولاد أنا ف حالي
زي النقش في العواميد



زي الهلال اللي فوق مدنة بنوها عبيد


وزي باقي العبيد باجري على عيالي


باجري وخطوي وئيد من تقل أحمالي


محنيه قامتي .. وهامتي كأن فيها حديد



وعينيا رمل العريش فيها وملح رشيد


لكني بافتحها زي اللي اتولدت من جديد


على اسم مصر.


على اسم مصر elmstba.com_1365799617_633.jpg


مصر .. التلات أحرف الساكنة
اللي شاحنة ضجيج



زوم الهوا وطقش موج البحر لما يهيج


وعجيج حوافر خيول بتجر زغروطة


حزمة نغم صعب داخلة مسامعي مقروطة


في مسامي مضغوطه مع دمي لها تعاريج


ترع وقنوات سقت من جسمي كل نسيج


وجميع خيوط النسيج على نبرة مربوطة


اسمعها مهموسة والا اسمعها مشخوطه


شبكة رادار قلبي جوه ضلوعي مضبوطة



على اسم مصر.

منقول





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.