العودة   منتديات المصطبة > الأقسام الأدبية > منتدى الحب والرومانسية

منتدى الحب والرومانسية مواضيع الحب والرومانسية وكل ما يتعلق بالحب وأنواعه وأروع ما قيل فيه من كلمات

بتحبوا بعض بجد ولا ده إدمان !!

كاتب الموضوع: أحبُكَ ربى، فى قسم: منتدى الحب والرومانسية


1 
أحبُكَ ربى


بتحبوا بعض بجد ولا ده إدمان !! 130982126571.jpg

ياترى مختار/ مختارة الشخص المناسب ولا لا ؟ عارف يعنى ايه حب؟ حب مش يعنى كلام حلو وعصافير بتصوصو وفراش طاير حواليك طول النهار..الحب مش سعاده مطلقه بدون سبب ؟
وسيبك من الافلام العربى اللى بتقولك “انا اول ماشوفتك حبيتك من أول نظره ” او “ انا حاسس انى اعرفك من زمان ” .

بتحبوا بعض بجد ولا ده إدمان !! 130982058811.gif

الحب هو…
الحب هو انك تقبل اللى أدامك بعيوبه..بصفاته الخنيقه..بعيلته..بكل ما فيه وتتأقلم معاه وتعرف تتعامل وانت مبسوط وراضى.
الحب انك ممكن تبقا حابب حاجات و تتغاضى عنها لانها مش مناسبه مع حبيبك…وده طبعاااا مش معناه انك تلغى شخصيتك او تيجى على كل اللى نفسك فيه وعلى طموحك لان لو اللى ادامك بيحبك بجد عمره ماهيوصلك لكده.
الحب انك تمر مع حبيبك بمشاكل انت عارف انها مشاكل او اختلاف فى الرأى وهيخلص يعنى هيخلص, لكن لو حسيت فى لحظه ان دماغك بتفكر فى الانفصال يبقا هنا مؤشر مش مظبوط واساس العلاقة مش قوى او مش واصل لدرجة الحب الصح.
ده مش معناه ان الحب وحش او حاجة مش لطيفة او زى ما بيقولوا
“ الحب بهدله وخلانى مأندله ”


بتحبوا بعض بجد ولا ده إدمان !! 130982058811.gif

الحب الصح مش جبنه صح الصح زى ما بيقولوا…لأنك لو حبيت حد هتلاقى نفسك عايز تدى وعطاءك هيبقا متجدد وبتحس مع العطاء ده احساس جميل مش هتزهق منه .. اه هتتخنق من حبيبك فى لحظات او فى مواقف بس هتلاقى نفسك لسه عايزه .. هتلاقى نفسك شايف فيه مميزات كتييييير بالرغم من عيوبه اللى انت عارفها برده لانك مش مفروض تضحك على نفسك او تستخدم التبريرعشان تريح نفسك راحة مؤقته.

بتحبوا بعض بجد ولا ده إدمان !! 130982058811.gif

الحب الحقيقى بيتحدد لما بيمر على الشريكين فترة مش قليلة بيتعرضوا فيها لمشاكل ومواضيع كتير وردود افعالهم بتظهر تحت ضغوط مختلفة ويمكن الفتره مش لذيذ انها تبقا قليلة عشان تحكم على علاقتك لان العلاقة لما بتطول شوية اى نوع من التجمل بيقل وبيظهر الانسان على حقيقته الا اذا كان ممثل بارع وقادر يستمر فى تمثلة لفتره طويله.


فى طريقتين للحب او ممكن اسميهم طريقين ; طريق سكة السلامه وطريق سكة الندامه ووجع الدماغ…

بتحبوا بعض بجد ولا ده إدمان !! 130982058811.gif

الطريقة الاولى : الحب اللى بيبدأ من العقل .. اوعى تقولى ان الحب حاجه بتحصلنا غصب عننا لا ده حاجه إرادية بشكل كامل ولو مش مقتنع كمل واقرا..
لما تيجى تحب بعقلك المفروض فى الأول تبتقا حاطط لنفسك معايير مش هتتخلى عنها (طلبات متقدرش تعيش من غيرها) بس متزودهاش وخليك عقلانى فى اختيار المعايير لان مافيش حد كامل…زى انى أقول ان اهم حاجه فى اللى هتجوزه انه يكون 1)مؤهل عالى ومش مؤهل عالى بالاسم وخلاص اقصد ان دماغة تبقا هيا اللى عالية مثقف وليه فكر ورأى. 2) اننا نكون فى نفس المستوى الاجتماعى والمستوى الاجتماعى قبل المستوى المادى لان المستوى المادى بيتلحق وبيتظبط لكن الاجتماعى عمره ماهيتظبط. ويمكن واحده غيرى تشوف ان المادى اهم من اى حاجة يبقا تحترم وده رأيها ودى وجهة نظرها ومبحبش اللى بيقولوا عليها مادية ممكن هيا تكون متقدرش تستحمل العيشة الا وهيا مرتاحة ماديا يبقا تشكرها لو عرفتك ده من الاول بدل ما تقولك “اكولها معاك بدقة يا حبيبى ولما تتجوزوا تطلع عينك على الدقة اللى بتأكلهالها..ماااعلينا….كل واحد عارف يقدر يستحمل ايه وميستحملش ايه .. وهكذا باللنسبة للمعايير. وبعد ما افكر فى المعايير الاساسية بتاعتى وفى حالة انى اصادف واحد استريحنا لبعض ويمكن اعجبنا ببعض يبقا اول خطوة اعملها قبل ما اخلى الاعجاب يزيد انى اشوفه مستوفى المعايير ولا لأ و لو مستوفيها يبقا تمام مش مستوفيها يبقا ستووووووووب…وللعلم الاعجاب ممكن اعرف اوقفه عند حد معين وبكل سهوله لكن لو تعدى مرحلة الاعجاب بيبقا صعب شويه وده لأسباب علمية مسئول عنها هرمون الأوكسيتوسين Oxytocin اللى بيفرز فى المواقف السعيده لما بتشوفى حد جميل وكويس وينفع انك ترتبطى بيه بيفضل يفرز اكتر واكتر وزياده افرازه بتؤدى لحاجه شبه الادمان فتلاقى نفسك بتحبها مثلا بالرغم انها متنفعكش اطلااااقا وتقول مش قادر اسيبها والكلام ده صحيح بس مش لانك مش قادر لانك وصلت لمرحلة شبه الادمان بتقدر تتعافى منها بعد انفصالك بحوالى 4 شهور وبتعانى فى الاربع شهور من اعراض بتشبه اعراض الانسحاب من اى أدمان..طب ليه تحط نفسك فى الموقف ده .. الحق/الحقى الموضوع بدرى بدرى.

بتحبوا بعض بجد ولا ده إدمان !! 130982058811.gif

اما الطريقة الثانية: هو الحب من اول نظرة..”بحبه ياباااابااااا” او “اصل انا بحبه معرفش ليه” لا طبعا كل واحد عارف بيحب اللى ادامه ليه..ثانيا مسألة انى احب حد وبعد كده اكتشفت ان فيه كذا وكذا مشكلة لانى خلاص هبقا تحت تأثير ادمان الشخص ده مش الحب الحقيقى..فلما مع اى حد يعجبنى اسيب المراحل تتطور من غير عقلى مايفكر والأوكسيتوسين يعمل عمايله من غير ما افرمل .. فى الاول هحبه وكل حاجة ويمكن أتبسط فى الحب ده بس الانبساط هيبقا لفترة محدوده هتخلص مع الجواز او لو الخطوبة طولت شوية _عشان كده اوقات كتير الناس بتحب تقلب وتخلص بسرعة فى الخطوبة تلاقى الخطوبة مكملتش 3 او 4 شهور وتلاقى الناس بتتجوز وتسألهم ليه يقولولك اصل الخطوبه لما بتطول بيحصل مشاكل_ ظلمتوا الخطوبة ياناس . الخطوبة لما بتبقا ماشية بالاصول ولما الحب بيبقا بالعقل قبل اى شئ بتبقا المشاكل مجرد خلاف وبيعدى ببساطة لكن لما الخطوبة بتطول الطرفين بيشوفوا فى بعض حاجات العادى انها هتظهر ولو مظهرتش فى الخطوبة بتظهر بعد الجواز ده بالنسبة للى بيجمل نفسه بيبان واللى بيحب بقلبه فقط برده الخطوبة الطويلة مش هتبقا لذيذه وهتبقا مليانة مشاكل…مااااعلينا…

بتحبوا بعض بجد ولا ده إدمان !! 130982058811.gif

اللى بيفكر بعقله فى الأول بيضمن لنفسه راحة فى علاقته وفى حاجات كتير الراحة دى هتضمنلك الاستقرار والاستقرار والتفاهم هيولد حب انشاء الله
بقلم : سلمى منصور




2 
الهام_لولو

جمييييييييييييييييييل جداااااااااااااا

تسلم ايدك


5 
الهام_لولو

جمييييييييييييييييييل جداااااااااااااا

تسلم ايدك



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.