العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"

هى والبحر ..!

كاتب الموضوع: الشاعر حاتم السمان، فى قسم: منتدى الشعر والخواطر


1 
الشاعر حاتم السمان

* البحر من فرحته ..
ع الشط بيصيف ..!
والرمله من حزنها ..
محتاره تشكى لمين ..!
الموجه عاليه ولكن ..
صبر السفن بيطول ..
والقلب لو يوم عشق ..
يلقى الفرح بساتين ..!
* وهى لسه كده ..
رافعه شعار عكننه !!
وبايعه نص ولادها ..
ومأجره الباقيين !!
رهنت عباية أبوها ..
فى طوبه وفـ أمشير ..
ولما حل الصيف ..
الرمله تشكى لمين .؟!
بحار ..!
يا بحر مين علمك ..
العوم فـ ضل الشمس ..؟
طول السفر والسفن ..
ولا البكا والهمس ..؟
لو حزنى خدنى فـ يوم ..
أما الفرح يا بحر ..
كان آخره أول أمس ..
* * *
أنا كنت يوم بحار ..
والموج ما عاندنيش ..
والبحر دا أسرار ..
انا كنت فيها باعيش ..
الدنيا دى مركبه ..
ركابها مش أبطال !
والحر لو يوم غرق ..
يرموا وراه بقشيش ..!!
يا بحر مين علمك ..
* * *
يا بحر مين علمك ..
تعطش وكنت السيل ..؟
فاتح حضنك لغيرك ..
وانت لوحدك دليل ..!
وفـ محنتك يا بحر ..
سابك وراح مشى ..
خلاك للناس توطى ..
وانت اللى كنت أصيل ..!
يا بحر مين علمك ..؟
* * *
يا بحر مين علمك ..؟
تقسى على شطك ..
تعبت معاك الرمال ..
من اعوجاج خطك ..
الموج يا بحر عالى ..
والريح بترفع فيه ..
البط شاف خناقه ..
ع الشط مستنيه
البط خاف م الشط ..
يا بحر وإحنا هناك ..
ويوم ما جانا هنا ..
لقى نفسه ملك إيديه ..!
يا بحر مين علمك ..؟
* * *
يا بحر مين علمك ..
الغدر والخسه ..؟
تعبت معاك الرمال..
بالفرح مش حاسه ..
بتبيع تراب الوطن ..
ع الشط للزوار ..
وعايزنى أتوضا منك ..
وميتك نجسه
انتهت




5 
الهام محمد

حلووة اوى وكلماتها رائعة تسلم ايديك



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.