العودة   منتديات المصطبة > الأقسام العامة > منتدى النقاش الجاد

منتدى النقاش الجاد ناقش معنا بهدوء وبدون تعصب أشهر وأهم القضايا والمواضيع التى تشغل الجميع

حوار حزين بين الأب وابنه !!!

كاتب الموضوع: أحبُكَ ربى، فى قسم: منتدى النقاش الجاد


1 
أحبُكَ ربى

بسم الله والصلاة والسلام على رسول الله

أما بعد

ده اول موضوع ليا فى قسم النقاشات ولكن مادفعنى للكتابة امر هاااااااااااام وواقعى من حياتى

الحكاية باختصار ان ليا اتنيين اصحاب احدهما والده متوفى من 2002 وهو مازال متأثرا به حتى الآن ويعتبره الشخصية الاولى واهم حد فى حياته ، والآخر والده موجوده رزقه الله البركة فى حياته ولكنه دائم السفر للملكة العربية السعودية ويوفر له حياة كريمة ولكن هذا الابن يكره والده



طيب بصوا شوفوا الحوار ده وعايز ردكم ع الاسئلة :

الأب : انت هاتمشى و تسيبنى خلاص
الابن : امال يعنى هاقعد معاك هنا و اسيب مراتى و اولادى

الأب : بس يا ابنى انا محتاجك جنبى
الابن : يا سلام طب ما انا كمان كنت طول عمرى محتاجك جنبى و انت كنت على طول مسافر

عموما ما تقلقش هنا فى مشرفين كتير يقدروا ياخدوا بالهم منك كويس لو احتجت حاجة

الأب : مشرفين و هو انا كنت باخلفك علشان دلوقتى ترمينى للمشرفين
الابن : طب ما انت زمان رميتنى لأمى و بعد موتها رميتنى لقرايبك كل واحد شوية
سيبنى امشى بقى و اوعدك مصاريفك مش هاتتأخر هابعتها لك أول كل شهر


الأب : و هو ده كل اللى هايبقى بينى و بينك مبلغ تيجى ترمية للإدارة اول كل شهر


الابن : طب ما هو ده كل اللى كان بينى و بينك حواله بتوصلنى أول كل شهر

الأب : يا ابنى حرام عليك داين تدان
الابن : يا ريت يا سيدى و زى ما عملت معاك يتعمل معايا

الأب : بقى بتتمنى ان ولادك يرموك فى دار للمسنين زى ما بتعمل معايا

الابن : لأ بادعى ربنا أحصد اللى زرعته زى ما انت بتحصد اللى زرعته

انت زرعت بذرة فلوس و روتها بالبعد و الجفا و القسوة

و حصدت اللى زرعته فلوس و بعد و جفا و قسوة

لكن انا بازرع فى ولادى الحب و بارويه بالعطف و الرعايه

و ان شاء الله هاحصد اللى بازرعه فيهم

اوعى يا والدى تزرع بذرة و تستنى المحصول من نوع تانى

الأب : طب و كلام ربنا يا ابنى

وَقَضَى رَبُّكَ أَلاَّ تَعْبُدُواْ إِلاَّ إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلاَهُمَا فَلاَ تَقُل لَّهُمَآ أُفٍّ وَلاَ تَنْهَرْهُمَا وَقُل لَّهُمَا قَوْلاً كَرِيمًا . وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا

الابن : شوفت ربنا سبحانه و تعالى قال ايه
وَقُل رَّبِّ ارْحَمْهُمَا كَمَا رَبَّيَانِي صَغِيرًا

اللى بينا ما كانش تربية و أبوة و بنوه

اللى بينا كان مشروع كفاله مادية

الابن يا والدى بيبقى مشروع العمر بالنسبة لابوه

انت استثمرت فيا فلوس

و انا مش هابخل عليك بالربح

زى ما زمان دخلتنى احسن مدارس و عيشتنى فى أفخم شقه

هادخلك دلوقتى احسن دار مسنين

زى ما زمان لما كنت باتعب كنت بتبعت مصاريف علاجى فى احسن مستشفى

لو حصلك حاجة هادخلك احسن مستشفى استثمارى فى البلد

زى ما زمان بعت مصاريف جنازة أمى و خليتنا نعملها احسن صوان و سيبتنى أدفنها لوحدى

أوعدك انى هاعمل لك أحسن جنازة و أفخم صوان

لو كنت لقيتك جنبى فى فرحى و فى جرحى

كنت هاتلاقينى جنبك

لو كنت حسيت بحضنك زمان

كنت خدتك فى حضنى دلوقتى

اللى لقيته فلوسك

و اللى هاتلاقيه فلوسى

و اسمحى لى بقى زرعتى أولى بوقتى يمكن ربنا يعوضنى بيها عن اللى عملته فيا

و احس معاهم بطعم البيت و الأسرة و الدفا اللى طول عمرك حارمنى منه

الموضوع وجعنى اوى وحبت اخد رايكم مين هنا الغلطان ومين الظالم ومين المظلوم




2 
princess emee

انا من راي ان الاب غلطان والابن غلطان
الاب غلطان لانه المفروض مكنش يقضي طول عمره في جمع المال واهله يرميهم طول عمره من غير اهتمام
التربيه عمرها ما كانت بالفلوس لازم متابعة من الاب حتى ولو كل شهر فترة لازم كان يخلي جزء من وقته لابنه مش لجمع الفلوس بس
الابن غلطان برده لانه المفروض يعامل ابوه احسن معامله لان هنا الاب كان فاكر انه يموت نفسه عشان يعيش ابنه احسن عيشه وتلاقيه كان بيجمع الفلوس بدمه وروحه مش بسهوله كدا يعني كان بيتعب عشان يريح ابنه
يعني المفروض كان الابن طول السنين اللي فاتت يكلمه يقوله يا بابا احنا عايزينك ترجع مش عايزين فلوس ويحاول معاه كتير وبكل الطرق
والوقتي لازم يعامله زي ما ربنا امره يعامله احسن معامله واكيد باباه عرف انه غلط لكن الابن المفروض يبر ابوه ويراعي ربنا فيه مش يقوله زي ما عملت معايا هعمل معاك
ويجعله بره بيه لوجه الله

لكن انه يعمل فيه كدا دا حرام وغلط وعيب
تسلم يا محمد ع المناقشه الهادفه دي
واسفه لو طولت عليكم



3 
5Lik Fe 7aLk

فعلا حوار حزين جدا

وزى ما قال كما تدين تدان والى ابوه عمله معاه فعلا اتعمل معاه دلوقتى اهو

بس اقول للابن ارفق بوالدك حتى لو هو كان سابك فى يوم من الايام خليك انت احسن هو بعد عنك ورماك

انت عايز تعمل كدا ودا حقك بس الاحسن والافضل انك ترحم ابوك لانه محتاجلك يمكن هو حس بغلطه وبيقولك سامحنى يبقى بدل انت قادر يبقى تسامحه لانه فعلا ندمان على الى عمله خليك انت احسن وانت تقدر انك تعفو وترحم يبقى جزاك الله كل خير

وياريت تعامله بافضل من كدا لانه محتاجلك فعلا تقف جنبه


5 
عيون حائره

الابن اتظلم طبعا لما كان محتاج لوجود الاب في حياته والاب كل اللي كان بيعمله انه يجمع المال
ونسي دوره كأب لازم يبقي جنب اولاده يحسسهم بحبه مش ان الصله اللي بتربط بينهم هي الفلوس وبس

والابن غلطان عشان معاملته لوالده هو المفروض يعامل والده احسن معامله لانه بيعامل ربنا
واكيد ربنا هيجازيه خير علي معاملته وهيباركلك في اولاده

حوار حزين جدا ووضع بيتكرر كتير للاسف
تسلم علي الموضوع المهم ده



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.