العودة   منتديات المصطبة > الطريق إلى الله > القسم الإسلامى العام

القسم الإسلامى العام خاص بالمواضيع الإسلامية العامة المكتوبة التى لا تحتوى على صوتيات ومرئيات دينية

أنا خــــايفة

كاتب الموضوع: رحلة مشتاقه، فى قسم: القسم الإسلامى العام


1 
رحلة مشتاقه


أنا خــــايفة 00940929146951196002.png



أنا خــــايفة

ده مش مجرد عنوان يشدكم
لاء بجد انا خايفه جدا

ومين فينا مش خايف !!

مين مش خايف على نفسه وعلى اهله ؟؟
مين مش خايف من بكره واللى ممكن يحصل فيه ؟؟

مين مش خايف يفقد اعز واحب الناس ليه ؟؟
مين مش خايف يضيع عمره فى الفشل ؟؟

اكيد كل واحد فينا خايف من حاجة

طيب هسأل سؤال تانى مالوش علاقه بالاول بس استحملونى


ايه اللى شاغل بالك ؟؟

  • * عاوز تأمن مستقبلك ومستقبل اولادك.
  • * عاوز تكون انسان ناجح فى حياتك وفى شغلك.
  • * عاوز تكون صاحب سلطه ونفوذ الاهم طبعا صاحب مال.
  • * عاوز تبنى بيت واتنين وعشره.
  • * عاوز ...عاوز ... عاوز ... محدش فينا هيقول خلاص كفايه.
أنا خــــايفة 6da1d8-9318d95b3279.jpg
يعنى خايف من او على
ومشغول وسط الدنيا
وعاوز كل حاجه

طيب فى وسط ده كله فكرت للحظه
ان المفروض تخاف على نفسك وبس
اه خاف على نفسك وبس
مين هيقول دى انانيه
ايوا بالظبط كده دى انانيه
وانا بطالب بالانانيه

يوم لاينفع فيه مال ولا بنون

فاكرين سؤالى الاول
أنا خــــايفة 6da1d8-9318d95b3279.jpg
طيب مين فينا مش خايف من

..... المـــــــــــوت .....

بس الخوف من الموت بيختلف من انسان عن التانى
يعنى هتخاف تموت علشان حياتك واولادك وفلوسك
ولا هتخاف علشان هتتحاسب على كل صغيره وكبيره !!


طيب اعتقد لحد دلوقتى الاسئله اللى بسألها طبيعيه ومنطقيه كلنا خايفين نموت ...
طيب السؤال اللى مش طبيعى بقى

جاهزة تموتى ؟!!
انت جاهز تموت ؟؟


  • سؤال غريب بس لو اتسألته هتجاوب تقول ايه ؟؟
  • طيب جاهز تتحاسب ؟؟
  • جاهز تدخل قبرك ويتقفل عليك وينصرف عنك الاهل والاحباب ...؟؟
  • جاهز لنعيم او لهلاك ؟؟
  • جاهز تقف قدام ربنا وتاخد كتابك بيمينك او بشمالك ؟؟

(( اللهم يمن كتابنا ويسر حسابنا ))

ها ... حد يرد عليا

عاوزه واحد بس يطلع يقولى اااااه انا جاهز للموت وجاهز للحساب كده بكل ثقه...

كتير ممكن يكونوا مش خايفين من الموت
لانه قضاء ربنا والحمد لله كلنا مؤمنين بيه


ومسلمين لقضاء الله

  • بس حد جاهز فعلا !!

* بتصلى ... بتصوم ... بتزكى .. اديت العمره والحج
برااااافو عليك .... (طيب يالا جاهز!!)

طيب قبل ماترد على سؤالى
اقرأ اللى جاى كده وبعده هسألك نفس السؤال

* قاعده الحريم او الرجاله مش فارقه كتير
بتحلى غير بسيره الناس ؟؟
طيب بطلتو غيبه ونميمه علشان تبقو جاهزين للموت!!ده حتى يأأخى
مش راحمين نفسهم ده حتى مكروهـ تتكلموا مع حد فى المسجد بيت ربنا

للصلاه والذكر بسـ


أنا خــــايفة 318653.gif

* صباح الخير ياحبيبتى ايه مش بشوفك ليه وحشانى موت
واول ماتسيبها تقول لصاحبتها يااااه دى بت خنيقه اوى وعلى قلبى زى السم
بطلتى نفاق علشان تبقى جاهزه للموت !!


ياجماعه والله انا قلبى وجعنى اوى

أنا خــــايفة 318653.gif

* شوفتى فلانه شايفه بيتها عامل ازاى
ولا جوزها انا عارفه بيحبها على ايه
صحيح ناس ليهم بخت
بطلتى غيره وحسد علشان تبقى جاهزه للموت !!



أنا خــــايفة 318653.gif

* بقولك ياماما انا هنزل اروح لـ سمر
علشان عيانه اوى ولازم اطمن عليها
الو ايوا ياسمر اوعى تتصلى فى البيت انا قايلالهم انى عندك وانك تعبانه علشان لو ماما سألتك
بطلتى تخونى الامانه علشان تبقى جاهزه للموت !!





أنا خــــايفة 318653.gif

* مبقاش الا دا اللى تساوية بيا
ازاى يعنى يترقى وانا اقدم منه وخبره عنه
يا أنا ياهو فى الشغل ده
بطلت غرور وتكبر علشان تبقى جاهز للموت !!



أنا خــــايفة 318653.gif

* يوووه بقولك ايه انا جايه من الشغل تعبانه ومش ناقصاك
بطلتى تعصى جوزك علشان تبقى جاهزه للموت !!


أنا خــــايفة 318653.gif

* انتى مجيتيش ليه امبارح يابنتى استنيتك كتير
معلش ياساريـه اصلى كنت تعبانه ومقدرتش انزل معاكى .. وهى اصلا كانت خارجه مع واحده تانيه
طيب بطلتى تكدبى علشان تبقى جاهزه للموت !!


أنا خــــايفة 318653.gif

* اووووف بقى ياماما هو مفيش غيرى انا فى البيت
ماعندك كلهم قاعدين اهم ماليش دعوه بقى
بطلت تعصى ابوك وامك علشان تبقى جاهز للموت !!


أنا خــــايفة 318653.gif

* مش فاطمه زعلانه منى ومخصمانى ماتصالحينى عليها
تصالحيها ايه يابنتى بطلى الهبل ده سبيها تخبط راسها فى الحيطه بقى تبقى هى الغلطانه وانتى اللى تروحى تصالحيها كده ميبقاش عندك شخصيه
بطلتى توقعى بين المسلمين علشان تبقى جاهزه للموت !!


أنا خــــايفة 318653.gif

* ايه يابنتى ده لبسك ضيق اوووى
وايه المهرجان اللى فى وشك ده
يوه ياماما ما كل البنات كده اشمعنا انا
انتم هتعقدونى انا لسه صغيره

(اصل الموت بيفرق بين صغير وكبير)
بطلتى تقتدى بالاسوء علشان تبقى جاهزه للموت !!


أنا خــــايفة 318653.gif

الامثله كتيييييييير ولو قعدنا نعدها مش هتخلص
حاجات كتير فى يومنا بنعملها واتعودنا عليها
وبقت بالنسبه لينا عادى جدا مفيهاش اى حاجه

أنا خــــايفة 318653.gif
ومتنساش بعد الامثله دى كلها وبعد كل الكلام ده
اللى ممكن اوى يدخل من هنا ويطلع من هنا
ان فى حاجه اسمها رد المظالم
اى واحدة او واحد اغتابتوهم
اى واحده او واحد ظلمتوهم
اى واحده او واحد خوضتو فى عرضهم
اى واحده ضحكت عليها
كل ده موجود ومكتوب عند ربنا وحسابك فى الدنيا والاخره عسير

أنا خــــايفة 318653.gif
هسألك بقى سؤال اخير بس تجاوب بصراحه

ولو حتى بينك وبين نفسك ومتكدبش على نفسك

لو مثلا عرفت انك هتموت وانك هتدخل الجنه وتتمتع بنعيمها ان شاء الله

بس فى شرط واحد بس

قبل ماتموت لازم تروح لكل واحده او واحد اغتبتهم

تقوللهم انا قولت عليك كذا وكذا وسامحنى

تفتكر هتقدر ... مش هتتكسف من نفسك ... مش هتندم ..

طيب مكسوف تروح تقولهم يبقى بتتكلم عليهم من الاول ليه اصلا ومكسوف منهم
ومش مكسوف من ربنا اللى خلقك...

الموضوع ده اظن محتاج وقفه جامده مع النفس واعاده تفكير وتغيير السواد اللى فى القلوب



أنا خــــايفة 318653.gif
مش معنى الكلام ده انى بلا عيوب
لا طبعا كلنا بنغلط بس بتفرق امتى ؟
بتفرق من اللى بيعرف غلطه وبيصلحه
واللى مش مقتنع انه غلط اصلا


أنا خــــايفة 318653.gif

مش معنى انى بصلى وبصوم وبزكى و...و...و..
يبقى انا كده تمام صحيح انا احسن من غيرى كتير


لسه مبدؤش .. لسه مبيصلوش .. لسه محتاجين صدمه تفوقهم

والمشكله انهم عارفين ان الصلاه عماد الدين من تركها ترك الدين وبيسيبوها للاسف الناس دى بقولهم بجد فوقوا

مفيش احلى من القرب من ربنا

جرب كده وهتشوف الفرق فى حياتك وفى اولادك وفى زواجك
او لسه ربنا هيرزقك بيه

هنتغير للاحسن وهنلغى اى سلوك وحش من حياتنا

اى سلوك نهانا عنه ربنا اللى بيحبنا

واللى مفيش حد فى دنيتك دى

حتى ابوكى وامك هيخاف عليك

وهيبقى حنين عليك وهيحبك تقربله

وهيفرح برجوعك له الا ربنا احسن من الخلق اجمعين ..

وقف شيطانك وابدء

وقولو هبقى احسن

اوعى تتردد يمكن نيتك للتغيير دى تشفعلك عند ربنا لو قبض روحك دلوقتى.

*دعوه لغلب الشيطان.
*دعوه للقرب من ربنا.
*دعوه لتحسين الاخلاق.
*دعوه من قلب صادق بيحبكم

عايزة ربنا يظلنا يوم لاظل الا ظله وينادى علينا اين المتحابون فى جلالى
نرد ونقول احنا يارب اجتمعنا على طاعتك فى الدنيا
فيجمعنا فى جنته وينعمنا بها فى الاخره

جاهزه تموتى .... !!!
جاهز تموت ....!!

ده سؤالى ليكـم بعد ماقرأتم كلامى؟




3 
crazy but not easy

الله عليكى يا قمر
موضوع فى قمة الروعه
جزاكى الله خير الجزاء

احلى تقييم

اللهم استرنا فوق الارض وتحت الارض ويوم العرض عليك
اللهم امين


4 
crazy but not easy

الله عليكى يا قمر
موضوع فى قمة الروعه
جزاكى الله عنا خير الجزاء

احلى تقييم

اللهم استرنا فوق الارض وتحت الارض ويوم العرض عليك
اللهم امين



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.