العودة   منتديات المصطبة > الأقسام العامة > منتدى النقاش الجاد

منتدى النقاش الجاد ناقش معنا بهدوء وبدون تعصب أشهر وأهم القضايا والمواضيع التى تشغل الجميع


1 
5Lik Fe 7aLk

وانا نايم بليل كدا مش جالى نوم لقيت نفسى بفكر فى سؤال معرفتش اجاوب بيه على نفسى

وهو انا استفدت ايه من الثوره ايه الى عملته ليا الثوره؟

فضلت افكر وافكر لحد ما مش لقيت جواب روحت نمت

وقولت اكتب التوبيك دا عشان اعرف كل واحد فينا استفاد ايه من الثوره

فيه راى هيجى يقولى ان الثوره عملت وعملت وعملت والحياه السياسيه والمهلبيه ومش عارف ايه والكلام الكبير دا

ماشى انا معاك بس انا استفدت ايه ان مبارك اتحبس ولا اتعدم حتى انا استفدت ايه

انا استفدت ايه من حبس جمال وعلاء والشريف وسرور وجربانه وغيره؟

استفدت ايه من شويه ناس مكنش ليهم اى لزمه وكل شويه كل شويه يطلعوا فى كل برنامج حوارى ويتكلموا ف السياسه والاحزاب والفلول والوطنى المنحل وامن الدوله و.............. الخ

انا استفدت ايه منهم

يمكن انا مش استفدت حاجه انا بس بتكلم عن نفسى انا

انا لحد دلوقتى مش استفدت ولا حاجه


لالا نسيت سورى

اه استفدت حاجات

استفدت ان مبقتش امن على نفسى ولا على اهل بيتى فى اى مكان ولا حتى فى عز الظهر

استفدت ان كل شويه فى بلطجه وناس غريبه كل شويه بنسمع بتعمل حاجات تشيب لها الولدان

استفدت ان الزباله بقت فى الشارع اكتر واكتر

استفدت ان كل واحد دلوقتى يطلع فى مظاهره ويعمل قلق وكل شويه نسمع عن شهداء ملهمش اى ذنب

استفدت ان الفتنه الطائفيه بقت فى كل مدينه بل فى كل شارع بين مسلم ومسيحى

استفدت ان دور العباده كل شويه بتتهد وبنشوف المظاهرات بتاعت الاقباط بيحصل فيها ايه

استفدت ان كله بقى ب لوى الدراع كل واحد عايز اى حاجه بقى يضغط ويلوى دراع السلطه الى فوقه عشان ياخد الى عايزه سواء بقى حقه او لاء ففى الحالتين بياخد الى عايزه

ولو مش اخد الى عايزه بقى يقطع الطرق ويوقف حركه القطارات وغيره وغيره

استفدت حاجات كتيره اوى لو عدتها مش هخلص لحد الصبح

بس نفسى اعرف كل واحد فينا من جواه استفاد ايه بالظبط

يمكن انا غلطان ولا حاجه

بس ونبى محدش يقولى الحياه السياسيه والمهلبيه والكلام الكبير دا

انا عايز اعرف انت استفدت ايه فى بيتك انت

بس فيه حاجه والله العظيم البلد دى عمرها ما هتتغير الا لما كل واحد فينا يغير من نفسه الاول

وبس




2 
روفان

اولا قبل ما ابدء ارد علي سؤالك ال ناس كتيره اوى بتسألو

افتكر ان مش ذنب الثوره ال هدفها التطهير ال بيحصل حاليا وال هيفضل يحصل لحد امته مش عارفين ومش ينفع يكون التطهير دا مش حصل بالكامل ونسأل استفدنا ايه من الثوره لما اهداف الثوره تكون اتحققت بجد وقتها بس نقدر نقول استفدنا ايه

احنا بالظبت عاملين زى حد عندو ضرس ملوث كل يوم ننضفه رغم اننا عارفين انو مش هينفع وغير صالح دا بقي ال بيحصل بعد الثوره الضرس دا كان لازم يتخلع بالكامل لان للاسف مازال فيه نماذج فاسده كتيره في الوزاره وفي الجيش نفسه

بتقول انك مش في امان فعلا كلنا مش حاسيين بامان مش سألت نفسك مين السبب في كدا ومين المستفاد؟
ال خرجوا البلطجيه وال حرقوا اقسام الشرطه في كل المحافظات في نفس اللحظه هما هما نفس الاشخاص ال فرحانين دلوقتي اننا تايهين وبنقول اخدنا ايه من الثوره

المسرحيه البايخه ال بتحصل في المحاكمه مبارك نايم علي السرير وفي الاستراحه بقوم ويبقي زى الفل هما يعني محتاجين أدله بلاش استهتار بينا بقي الادله واضحه وال عملو اي عيل صغير عارفه بيمطو ويطولو ليه مستنيين يموت وتبقي بجميله

هقولك انا بقي استفدت ايه كفايه عليا بس اننا شوفت مبارك وجمال وعلاء في القفص اللحظه دي عندي بالدنيا وواثقه في عداله ربنا انو مش هسيب حق مظلوم لان المحكمه مش هتجيب حقنا ودا واضح جدا

ممكن اتكلم لبكره ال بيحصل بيستفزني جدا بس الكلام مش منو فايده وال بيزعلني بجد ان لسه فيه ناس مش فاهمه ال بيحصل مش فاهمين ال جوه طوره عصابه بتخطط لخراب البلد ماهو يا نسيبهم يسرقونا ياما لو حبسناهم هيكلونا

سورى ع الاطاله


3 
5Lik Fe 7aLk

بردو مش عملتلك حاجه الثوره او بمعنى اصح مش استفدتى منها حاجه

علفكره انا مش بهاجم الصوره ولا حاجه

بس بجد نفسى اعرف عملت ايه لكل واحد فينا

الثوره بقالها 8 شهور او اكتر شويه ومش حاسس باى حاجه ليا منها

يمكن مش ليها مميزات دلوقتى خالص ويمكن استفاد بعدين

بس انا مش هستنى لما اموت وانا ماشى فى الشارع عشان ابقى استفاد منها

لو بالمنظر دا

فيوم من ايام مبارك احسن

يمكن كان فيه بلاووووووووووووى بتحصل وفعلا كانت بتحصل ايامه بس مش بالمنظر الى بقينا فيه دا


4 
روفان

للاسف مش فهمتني يامحمود عملت زى واحد ذاكر وعمل ال عليه طول السنه بس شال ماده بسبب دكتور مش عندو ضمير يرجع بقي يندم انو عمل حاجه صح ويقول دا ال اخدته لما مشيت صح

اهو الثوره كدا الشباب عملو ال عليهم بس للاسف النظام الفاسد والحراميه ال كانو ماسكين البلد مش ساكتين ولا هيسكتو وقاصدين يعملو فوضي ويملو البلد بلطجيه علشان نقول اخدنا ايه من الثوره ويطلع ناس زيك تقول ما كنا ايام مبارك ارحم هو دا هدفهم وتقريبا وصلو ليه خلاص

فعلا كنا احسن وبنتسرق وبنتهان وبنتنهب هتقولي دلوقتي بنتسرق هقولك كفايه انو الحرامي الكبير اتسجن عقبال الباقي كفايه ان الرئيس ال جاي عمره ماهيبقي بالفساد دا مش شفافيه منو لاء هيخاف

بتقول ايام مبارك ارحم اه كنا بناكل وبنام بس احنا عايشين علشان ناكل ونام وبس

انا فاهمه قصدك وانك مش ضد الثوره بس صعبان عليك حال البلد بس صدقني الثوره مش السبب لما البلد تنضف بجد وقتها هنحس بقيمه الثوره وهنعرف استفدنا ايه

تسلم ايدك ع التوبيك


5 
امـ,,ير الاحـ,,ـزان

يمكن كلامك منطقى وبيقولوا ناس كتير جداااا

لا ومش كدا دول كمان بيشتموا فى الثورة

واننا دلوقتى مش عايشين فى امان

وبدأو يقولوا مبارك وايام مبارك

بس خلينى ارد عليك بالبلدى كدا

لانى مش هعرف انسق الكلام فـ استحملنى معلش

اقولك اول حاجه استفدناها اننا بقى لينا كرامة

احنا كنا عايشين انا وانت وغيرنا

اتولدنا وكبرنا ورئيسنا واحد

كلنا كنا كل يوم مش بنسمع الا على انتصارات وامجاد وتقدم

واحنا مش شايفنة بعنينا

كنا بنسمع ان بلادنا احسن بلد فى الدنيا

وأمن بلد فى الدنيا وانطف بلد فى الدنيا

وكفاية اننا مصريين

استفدنا اننا صحينا من الحلم دا

فوقنا من الاوهام

تفتكر لما تفضل 30 سنة تخرب فى حاجه

هتقدر تصلها بعد كدا فى سنة واللى اتنين

عمرك حسيت بمعنى كلمة انك بتحب مصر

الا بعد الثورة وخصوصا الشهر اللى بعد التنحى

وقتها عرفنا فعلا ان لينا دولة ويعنى اية مصر

لما كلنا نزالنا الشوارع ونطفناها

يمكن الموضوع اخد زهوته وراح

لكن صدقنى هيرجع تانى

هو راح لان الناس كانت فعلا تعبانة

وكله بقى يقول نفسي والحق حاجه

لكن ان شاء الله هنرجع تانى لما الامور تستقر

تفتكر لما نلاقى نفسنا

دى مش كفاية اننا نستفدها



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.