العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"

قصيدة ( بحبك يا بلدى )

كاتب الموضوع: الشاعر/ناصر على، فى قسم: منتدى الشعر والخواطر


1 
الشاعر/ناصر على

قصيدة ( بحبك يا بلدى )

--------------------------

بحبك زى نخلة تتمايل

ولا تطاطى

وحتى لو رموكى بالرصاص الحى

او حتى مطاطى

يا نخلة مزروعة

ف حضن التاريخ ع النيل

طول ما انتى عالية

سيبك من الواطى

*****

بحبك زى طير عشش

على ولاده

بجناح سنابل دهب

والطرح فى ميعاده

لو التاريخ محتاج لنورك

نورى الصحبة

اصل التاريخ ابتدى

عندك وبميلاده

*****

بحبك زى نسمة نادية

فوق جبال الصبر

ضحكة وصداها

يمحى نار الغدر

يا سوسنة خضرا

وناضرة وعفية

انا كل ما انبش وافتش

بالقاكى ف كل حرف وسطر

*****

بحبك زى مادنة

طرحها تكبير

وأدان واخدنا

من صغير لكبير

يا ام الغلابة

ياطيبة وطاهرة

متفرقيش بين الوزير

وغفير

*****

بحبك زى زغرودة

لبنوتة بحنتها

مالى عنيها الخجل

وعارفة سكتها

ومسلسلة الخوف

حبساه فى زنزانة

وعمرانة اليالى

مع صفو ضحكتها

*****

بحبك زى صرخة

تصيب كما المدفع

دول مش ولادك

اللى خانك واللى

عاش يرتع

دوول مهما بدلوا

الوشوش خاينين

اصل السماح للخسيس

عمره ما بينفع

*****

بحبك شمس طوبة

مش رياح امشير

بحبك خير بؤونة

وزقزقة عصافير

يا صفصافة على الترعة

ضللها شاهد

ودافن تحت طينه

الاف زعابير

*****

بحبك ومش عارف

بحبك ليه

بحبك يا واخدانى

فى قلب التيه

بحبك وانتى مش

عارفة ومش دارية

بحبك موت

يا اسرانى

يا بنت الايه

يا مصر بحبك

........................

ناصر على توفيق _ سوهاج

___________________





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.