العودة   منتديات المصطبة > الأقسام الأدبية > منتدى الحب والرومانسية

منتدى الحب والرومانسية مواضيع الحب والرومانسية وكل ما يتعلق بالحب وأنواعه وأروع ما قيل فيه من كلمات

شريكتك ...

كاتب الموضوع: غــنـــــوه حزيــــــــنه، فى قسم: منتدى الحب والرومانسية


1 
غــنـــــوه حزيــــــــنه

شريكتك ... 393970_10150713124874148_619019147_12017960_1982811927_n.jpg

عارف لما بتخيل حياتنا بعد كده ... بحلم بيها ازاى ؟


نفسى ف بيت صغير ... مش فيه اى حاجه غير الاساسيات .... عشان بعد كده نملاه احنا بكل حاجه بنحبها وأهم حاجه يكون فيه مكتبه مليانه بكتبى وكتبك

نفسى ابدا معاك من الزيرو ... عشان كل حاجه نعملها تبقى بنكهتنا ....

اى حاجه جديده يبقى فيها لمستى ولمستك مش كل حد مع نفسه

نفسى اوى نكون اصحاب ... مش مجرد زوجين وخلاص الفجوه بينهم كل شويه تكبر

نفسى لما تتضايق .... من اى حاجه تعرف انك لما ترجع البيت هتلاقى امانك وسكينتك جواه زى غرقان وصل للشط

ايون نفسى اكون شطك :)

ولما تضايق منى ... نفسى تشتكيلى منى مش تشتكى لحد تانى

وانا اوعدك انى لما ازعل ... هشتكيلك منك برضه مع انى اصلا واثقه انى مش هعرف ازعل منك :)

ولادنا بقى ... نفسى كلهم يبقوا شبهك ويكونوا بيحبوك اكتر منى ... هما اصلا كده كده هيحبوك اكتر منى لان مش هيكون ليا سيرة غيرك حتى لما أحكيلهم حواديت مش هحتاج احكى عن الشاطر حسن لأن انت عندى احسن من الشاطر حسن أو غيره :)

عارف بقى ... لما نكبر والتجاعيد تملا وشنا .... مش هزعل زى كتير من الناس بالعكس هفرح اوووى

هفرح لان كل خط او تجعيده معناها ازمه اتغلبنا عليها سوا

كل ماللون الاسود ف شعرى وشعرك يختفى ... معناه يوم جديد ضيفناه للدنيا مع بعض وعمر عشناه بحلوه ومره

كل مالضهر ينحنى ... كل ماهنفتكر احلام رسمناها ووصلنالها وازمات اتكعبلنا فيها بس قومنا بعض

كل ده معناه عندى سنين عشناها مع بعض فاتلخبطت ملامحنا وبقينا واحد ف اتنين

ضحكتنا واحده ... تفكيرنا واحد ... لما تسكت هبقى عارفه انت عايز تقول ايه هفهم سكوتك قبل كلامك

اتاكد ان لو كل الناس كدبتك ... انا هصدقك

و لو كل الدنيا وقفت ضدك ... انا هنا معاك

و لو حلمك وقع من ايديك ... هتلاقينى جنبك بدور عليه

ولو ابتسامتك اختفت ... هنرسمها سوا

لأن ببساطة ف واحده ف الدنيا اتخلقت عشان تكون " شريكتك "

ولأن ببساطة برضه هى دى معنى الشراكه ف قاموسى ... :)

.................

الكلام اللى فوق ده تخاريف مستوحاه من الصوره اللى فوق دى اللى هى اصلاً من فيلم الكارتون اللى بحبه ده " up "





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.