العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"


1 
رحمة الفؤاد



مكملين
للي مش فاهمين نزولنا
للي مش فاهمين نزولنا
للي ما داقوش مرنا ولا قهرنا و حسوش نزولنا
للي معاشوش مر جوعنا

اللى مناموش ف الشوارع كالدبايح
كملو ف الليل عشاهم م الصفايح

للي مش حاسين مهانة الرجال
قهر الرجال
اللى بيقولو علينا حبة عيال
احنا مش حبة عيال
احنا مش حبة عيال

احنا شوفنا النيل بينشف ف البيوت
واما يجري يتفرش حمام سباحه ف قصر باشا
مستكترين فيا الغضب منا كنت غرقان ف البشاشه
انا كنت راضي ببق ميه واقول دي هانت
كنت ببكي ف القصايد
كنت بشتم ف القصايد
تتقطع ايدي لما قلت حبيبتي ماتت
للي مش فاهمين نزلونا ف الشوارع
احنا بندور على الحلم اللي ضايع
احنا جرينا النفس ف عروق عيالنا
يكبرو فاهمين حاجات مفهمنهاش
أقبل اني اعيش عشان حلم وقضية
بس ما اقبلش ان عمري يضيع بلاش

ما احنا سبنالكو البلد
ما نصفتوهاش
متلوموش ع الى اتعجن ف المعجنه واللى اتظلم
واذا كنتو فاكرينا غنم
على حظكم انا جَدي فاق
اذا كنتو فاكرينا غنم على رزقكم انا
جَدي فاق
فاكرين زمان حذرتكم
مستني ايه من طفل ربوه بالزعاق
غير المشاكل والخناق
اذا كنتو فاكريننا غنم
على رزقكم انا
جَدي فاق

ارزااااق
للي مش فاهمين نزلونا ف الشوارع
الحكومه
نزلتنا ف الشوارع
بيتتنا ف الشوارع
الحكومه
قفلت على نفسها كل البيبان
ف أترمينا ف الشوارع
أكتر مكان لقيناه أمان

اللى خايفين ع البلد لأحسن تموت
متخافوش
الموت سكوت
واحنا مش ف الخطة أصلا ان بكره يكون سكوت

احنا شايلين حملنا
ومكملين
بكره بيشاور علينا واحنا مش مستعجلين
ما احنا لينا كام سنه متقندلين
صابحين ف طين
نايمين ف طين

احنا بنأسس بلد
احنا بنأسس بلد تسمع شكاوى المظلومين
نشتكي
نلقى اللى يسمع شكوت الناس الغلابه الطيبين
نشتغل نلقى عرقنا قصاد عنينا
مش ف جيب النصابين

احنا بنأسس بلد
لا هي خايفه من صوت الادان
ولا خايفه من أن الكنايس تتبني

احنا بنشكل وطن عفيان غني
مش وطن يخدم 15 نفر ويبات جعان
احنا مش عاوزين وطن مزلول مهان
المصري
مش لايقه عليه كلمة مهان


ويقولك احنا عملنا فوضى
طب احنا برضو عملنا فوضى ؟
احنا برضو عملنا فوضى ؟؟
دا احنا كنا بنتجلد ونعيش ونرضى
واحنا كنا بنتسجن ونعيش ونرضى
كانت الأسعار بتغلى وكنت برضى
والشرطه بتفتشني عادي
ف أي وقت ف أي حتة بدون مناسبه وكنت برضى
والإنتخاب من سن كام لسن كام معرفش ليه وكنت برضى
جاي النهاردة
تقولي تقولي احنا عملنا قوضى ؟
طب فوضى فوضى

ونتحاسب
ماسورة الغاز بتقفلها لصعيد بلدك
وتل أبيب بتفتحها
ماسورة الغاز بتقفلها على ولادك
وللأعداء بتفتحها

وناس شقيانه طول اليوم عشان لقمة
وغالي ياخدها ع الجاهز
إلهي يارب يطفحها
وناس تسكن قصور بتدور
وناس الجوع بيدبحها
وناس بتموت في الميادين فدى الثورة
وناس خايفه على مشاعره لنجرحها


احنا حنكمل
احنا حنكمل
وهنزق البيبان
يارب
انت المستعان
واللى بيقولو علينا مغيبين
ومسطحين ومجوفين ومعفنين ومنتنين ومأجورين



قولو براحتكو
احنا برضه مؤدبين ومسالمين

بس احنا برضه
مكملين





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.