العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"

شعر جامد جدى

كاتب الموضوع: قمر على، فى قسم: منتدى الشعر والخواطر


1 
قمر على

=========
على حد عِلمى ..
إحنا وإسرائيل حبايب !!!!!!!!!
وفيه سلام .. ومفيش حرب
طب الظُباط والعساكر دول ...
بيعملوا إيه بقى فى ميدان طلعت حرب ؟
فى وسط البلد
بنت وولد
بيشوفوا بلوزه تليق على الإشارب !
بيحلموا . وبيغنوا .
وأجمل مافى غناهم ..
إنه طالع من القلب ..
من إمته العِشق بيموت من الخوف ؟
ومن إمته الحِلم بيخاف من الضرب ؟
===============================================
تُراب السفر !!
==========
أنا بان على الكِبر
ولا تراب السفر
ولا ده شكل الخوف !
من غير ونس !!!
ياقمر ..
أنا بان على الزمن
واللا ده رُخص التمن !!
واللا دى غُربة روح !
وسط الصحاب ياوطن !
أنا بان على الهوان !
واللا ده إيه . ده كمان
ودى دموع الفرح ..
واللا دموع أحزان ؟
==========================================
بقيت اخاف !
==========
بقيت أخاف من طبيب الأسنان !
ومن كل الطيور .. حتى الكروان
وم الشاى اللى فى الُدكان
وم السُكَر .
ومن الحادق ومن الحراق
ومن الحلاق !!!
ومن عسكرى ومن الاتوبيس
ومن إبليـس !!
من الشارع والرصيف والرغيف !
وأخويا الضعيف !
وقطر السكه الحديد
مش هو (لقمح)برضُه
زمان كان له عيد !
وكان له غنوه حلوه .
فى كتاب الأناشيد ..
بحبك يابلدنــا ..
بس يابلدنا ..
من بعيد لبعيــــد !!
=========================================
ورحمة اُمى !
=============
عندنا هرم .. وعلم .. وأعياد للطفوله !
وعيادات للعلاج .. بس على طول مقفوله !!
وأرقام تليفونات .. وقت الأزمات !! مشغوله !!!
وعندنا ألف جامعه !!
وشكوكو وأبو لمعــه !!!!!!
وناس طرشه .. بس سامعه !!!!
وكراسى كــتيــر مسئولـــــــــــــه !!!!!
وعندنا أولاد فى الشوارع
لا راحو كى جى وَن
ولا شافوا سنه أولــى !!!
بتتكلم جد ؟؟؟
آه . ورحمة اُمى واُمــك
معقولــه !!!
========================================
مِــرايــا !
==========
قُلت أبُص فى المرايا
يمكن أكون إحلــويــت !
فضلت داير أبُص
مخلتش ولا مرايا فى البيت
فى الحمام وفى الأوده وفى الدولاب
أو متعلقه فى الحيط .
شوفت .. سِكِــت . شويه وبعدين إتخضيت !
معقول أنا قضيت العُمر ده كله
وزى مارحت زى ماجيت !!
معقول أنا عُمرى مافكرت ولا إتغيرت ولا حبيت !
وإزاى ساكِت على رُوحى . ده كله .. وليه إستنيت ؟
ياريتنى ماكان عندى مرايا
وياريتنى مابصيت .
=============================================
حرامى زمان !!!
===============
حرامى زمان كان جدع وإنسان !!!
يسرق حبل غسيل ..
شراب .. منديل .. فستان
جوز فراخ من على سطوح الجيران
ويتقفش وينضرب ويتزف ويتهان ..
وينكسف على دمه .. ويسمع كلام أبوه وامه
وممكن يتــوب ..
أما حرامى دلوقتى .. أشجع الشُجعان !!!
يهبش ويحف ويسِف
لايخاف ولاعينه تِرف ..
وله ألف لسان
ومبيسمعش حد ..
ولاينفع يتوب !!
=====================================
تيجى !!!!!
==================
تيجى نهرب من الحقيقه !
من الصور
من خبر عاجل يخُض
تيجى لانفهم ولانِعرف .
ولا نقدر نِرُد !
نهرب من الأمل
نِطلع بطاقه بدون عمل !
نبقى يعنى فى اللذاذه !!
ونبقى ملناش عازه !!
زى كل شئ جميل
مستحيل !
هى كده . وملهاش بديل
تعشقها . تيجى رِجلك
وتيجى تهرب بجلدك .. تِنجرح
يوجعك قلبك بِجد ..
ولاتقبل أى حاجه . ولا تبقى أى حد
تيجى !!
====ربنا يسهل !!
=========
بقول لها .. بحبك . بحبك .. بحبِك !
قالتلى .. كده ده كِــــــــــدب !
قولتلها . صدقينى
لا أنا فى المُعارضه .. ولا فى الحِـــــــزب !!
قالتلى .. بس السكوت خيبه
ولولا العيبه
كنت أقول .. وأقول كمان
الله يرحمه بقى يابا
وياميت خساره ع الجِـــــــدعان
قولتلها وطى صوتك
بلاش جِـــــــنــــــــــــــــــان !
كل الحكايه ..
أنا حاسس بشوية سخونه
وبـــــردان ..
إدينى بس إنتى شوية حنــان
وربنا يسهِــــل !!!
============================
طِلع الكلام ناشِف !!
=============
كان نفسى أقول
غِنوتى ناعمه رومانسيه
طِلع الكلام ناشِف .. وكاشِف
هموم فيــــــــــــــــــــــــــــــا ..
لا القلب نفس القلب
ولا الحياه هيــــــــــــــــــــا !!
=============================
يادى النيله !!
==============
مش عارف . هو أنا قليل البخت
ولا قليل الحيله ؟
كل ماأقول قربت خلاص
ألاقى السكه لسه طويله !!
يادى النيله !!
ده أنا م الصُبح بعدل فيها !
بأى وسيله .. وكل ما أحاول أفرح
تطلع منى الضحكه حزينه !!
بص بقى هو الحظ .. والدنيا بجد بجد بخيله !!!
مفيهاش فرح .. ومفيهاش قمح !
ومفيهاش قطن طويل التيله !
هى الناس مَبقتش تفرح ليه ؟ فى المواسم
حتى كل سنه وانت طيب .. بقت قليله !
لكن عارف .. رغم الخوف !
والنار .. والسَكينه ..
لسه بلدنا . فيها حاجات جميله !!


==============================
يابـاشمُهندس
===============
ياباشمُهنس .
يااُسطى .. ياريس ..
ياعم .. ياكابتن .. يادكتور ..
ليه الطابور .. مش ماشى بالدور !!!
ياناس الرحمه .. الاسنانسير عطلان !
وكلنا ساكنين فى أخر دور !!
هى البلد دى .. مفيهاش ناس طيبين !!؟؟
ولا ناس ناويين .. ولاناس عايزيين ..
بقلنا سنين . بنلف مع التـــور !!
عشان نعدى الرصيف ــ نتمرمـــــط !
وعشان نضحك شويه .. لازم الأول نلطم ونعيــــــط !!
وعشان نغسل وِشِــنا .. لازم نشغل الماتـــور !!!
إيه ياكابتن . ياباشمهندس .. يادكتـــور !!!
==================================
لبن .. سمك .. سيراميك !!
=====================
بدعيلك ياضنايا . ربنا يحميــــــك
من إبره مسمومه .. جاهله . أو قاصده تأذيك !!
مِن علبة لبن ببودرة السيراميك !!
مَعدش يابنى فى الفجر أدان .. ولا ديك !!
ولا عدش فى الوطن شبابيك .. (بتطُل على بُكره) !!!!!!!!!!!!!!!!!!!!!!!!!!
============================================




 من مواضيع قمر على


Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.