العودة   منتديات المصطبة > الأقسام الأدبية > منتدى الشعر والخواطر

منتدى الشعر والخواطر للأشعار والخواطر المكتوبة "للحـَرفِ توهّـجْ.. مـَراياَ للصـُدورْ تـُرجُمـَان للمشاعـِر"

الثورة فى عيون الحكام

كاتب الموضوع: ابو رانيا، فى قسم: منتدى الشعر والخواطر


1 
ابو رانيا

الثورة في عيون الحكام
قالوا أيه.. قالوا ثورة
نار وقامت ف البلاد
جمعت كل الضحايا...
الغلابة .. والبطالة ..
وال مش لاقيين يعيشوا..
وال تعبوا م الرقاد..
كلهم بيقولوا لأ ّ..
مش هنفضل طول حياتنا
راسنا تحت ف الرماد
عشنا عمر طويل بنحلم
نفس أحلام الولاد
إما خايفه.. إما فاضيه..
إما مكبوتة بزناد
والنهاردة الطلقة طلعت..
ولعت كل البلاد..
****
واضح إن الناس دى هاجت
جالها مس من الجنون
أو كان قيامة قامت
زلزلت كل السجون
سجن جوا كل قلب
سجن حابس اى عقل
سجن لامم كل راجل..
كل طفل.. وكل ست ..
سجن حارم اى فكر.. واى حب.. واى سر
سجن فاضحك ...مهما تلبس او لبست
والقيامة لما تهدر
مين هيقدر ...
مين يوقف اى حر؟؟
مين يوقف اى جائع ..
اى عاطل ..
اى مظلوم صابه ضر؟؟
كل شر وأخره شر..
يبقى لازم...
م البداية..
كل خلق الله دى ترجع..
لجل تركع في الجحيم...
*****
قالوا أيه ؟؟
قالوا ثورة ..
فتحت كل العيون
وال كان طول عمرة نايم
قام بيفرك في الجفون
وال كان مقهور وخايف
خلف جدران السجون
فجأة ولعت فيه شهامته
قالها ثورة..
مهما كان ... أو راح يكون..
*****
قال و عايزين أيه... عدالة !!
قال ... وجنب العيش .... كرامة !!
قال ... وحرية ووظيفة !!
منها ياكلوا اى لقمة تكون شريفة ..
يبدوا إن الناس دى فلتت
لما شافوا الخير بعينهم
لما حسوا الأمن عشش فوق حيطانهم..
لما عاشوا ف حلم اكبر من خيالهم
أصل برضه .. كل حاجة وليها حد
وال يحلم ... حلمه محتاج رد جد..
دا العقاب – ف بلادنا طبعا –
حكم ملهوش اى رد..
*****
يعنى ايه عايزين عدالة ؟؟
لو ميزان الحق يعدل..
تبقى هى دى الضلالة !!
يعنى ايه عايزين كرامة ؟؟


الكرامة للشعوب هى المهانة.!!
وال ياكل بكرة راح يكبر علينا
وال يلقى شغلة دايمة
بكرة يجرى القرش ف ايده
راح يخزق بيه عنينا..
وال يحلم .. راح يفكر..
وال فكر.. راح يدبر..
وال دبّر بكرة تدبيره علينا
يبقى لازم....
كل خلق الله دى تركع
لجل تعرف..
ان مهما الناس تثور
زيها زى الهشيم...
*****
لو دى غابة ...
احنا فيها السادة ..احنا المسؤولين...
البلد دى للاكابر
وإحنا فيها الأمرين
وف طريقنا..
احنا بس علينا نرسم
كل خطوة تكون عليه
وإحنا برضه..
بس نختار اى رجل تسير عليه
وال يحلم انه يهرب من ايدينا
وال يرمش بس لحظة..
قبل ما يشور حد فينا...
مش هيصعب يوم علينا
يبقى لازم..
كل خلق الله دى تفهم..
لجل تمشى ف السليم...!!
*****
يعنى أيه الناس تثور؟؟
دى مؤامرة أو فجور
يعنى أيه عايزين يعيشوا؟؟
دول حشيش شيطانى نبت بالشرور
يبقى هو الحل واحد
هو قلعه م الجذور
راح نقتل..
مش حرام!!
التراب بالدم اطهر م التراب
والعذاب للناس دى ارحم م الخراب
لما ييجوا هددونا
إحنا مش ناقصين شباب
دا الشباب معناه عزيمة
والعزيمة ريح قوية
لو نسيبها راح تقلع كل حاجة
إحنا عايزين شعب تافه
مهما يقوى ..يبقى عامل كالسراب
مهما يلمع .. يبقى وهم..
مهما يحلم.. يبقى حلم..
والخلاصة...
القانون ما فهش ثورة
والعبيد مكتوب عليه
كالنعال ..ما تعش حرة
وال ثاير .. يبقى خاين
وال خاين عيشته تحرم
دا قانونا ....
وال مش عجباه عيشتنا .. بكرة يندم
جمال نصير في 25/2





Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.