العودة   منتديات المصطبة > الأقسام العامة > منتدى المواضيع العامة

منتدى المواضيع العامة أهم المواضيع والقضايا العامة التى تشغل الرأى وتهدف إلى نشر الفائدة للجميع

ألف رحمة ونور عليك يابا

كاتب الموضوع: غــنـــــوه حزيــــــــنه، فى قسم: منتدى المواضيع العامة


1 
غــنـــــوه حزيــــــــنه

ألف رحمة ونور عليك يابا
ألف نخلة طارحة فوق قبرك
ألف صبارة علي صبرك
ألف مسكين وقفوا علي بابك
وأحكي وسطيهم علي غيابك
ألف قلب وقلب أحبابك
يا صديق في دنيا كدابة
ألف رحمة ونور عليك يابا
>>
ألف رحمة ونور علي أيامك
لسه صوتك فيا وكلامك
لسه نقط المية من كوعك
تروي عيني لما تتوضي
لسه عالسجادة في ركوعك
دمع أصفي وأغلي م الفضة
لسه ساكنة قلبي أحلامك
بالسلام والحب.. في غابة
ألف رحمة ونور عليك يابا
>>
بين ايديا قلمك المبري
عالورق مابقاش خلاص يجري
مين يقول إنه أديب بعدك
اويفكر... ولا يستجري
اللي مسك السيف ماهوش فارس
هو وحده الدايم الوارث
قلمي تلميذ يحبي في مدارس
فيها حمد وبهجة ورحابة
ألف رحمة ونور عليك يابا
>>
قد كل الدنيا صندوقك
اللي أشعل ثورة بهدوئك
واللي خلا لكل عابر سبيل
حق.. وانت زهدت في حقوقك
ضحكتك تهدي الأمل في الحياة
واللي ضل طريقه يلقي اتجاه
يمشي في نور أنبياء الله
تمشي وياه في السما سحابة
ألف رحمة ونور عليك يابا
>>
موش مهم انك تعيش في قصور
موش مهم انك تقع مكسور
المهم انك ما تقبلشي
يبنوا لخيالك حيطان أوسور
الوطن والحلم متحاوطين
والح**** قايدة في الميادين
واللي صوته بيعلا تجار دين
والنقاب بيقطعوه بالزور
غيظ وجهل وفقر وخيابة
ألف رحمة ونور عليك يابا
>>
قلبي مشتاق للسفر صحبة
يمكن ألقي الأنس في الغربة
قلبي تعبان من قراية العيون
فيها غش وكدب ومواربة
ياتري يابا الحياة عندك
حلوة زيك.. برحة في التربة؟!
ياتري يابا الحياة عندك
جنب أمي فيها ضحك وهنا؟!
لولا خوفي أعصي او اعاندك
كنت أدعي الموت ياخدني أنا
كان أبويا وكان كمان ابني
كان كبيري.. وله غلاوة الضنا
يادموع ليه عاصية غلابة
ألف رحمة ونور عليك يابا





4 
لؤلؤة مصرية

ربنا يرحمه يارب ويجعل مثواه الجنة باذن الله ادعيله دايما واعمليله صدقة جارية شوفى مسجد بيتبنى وحطى فيه صدقة وباذن الله هتروحله كل مايصلى حد فى المسجد


ربنا يصبرك على فراقه



Powered by vBulletin® Copyright ©2000 - 2019, Jelsoft Enterprises Ltd.
المواد المنشورة في منتدي المصطبة لا تُعبر بالضرورة عن وجهة نظر القائمين على الموقع ولكنها تعبر عن وجهة نظر كاتبها فقط.